काठमाडौँ । नेकपा एमालेका अध्यक्ष केपी शर्मा ओलीले केन्द्रीय सदस्यको अद्यावधिक गरी पठाएको विवरणलाई निर्वाचन आयोगले मान्यता नदिने भएको छ । अध्यक्ष ओलीले पछिल्लोपटक अद्यावधिक गरी २६० केन्द्रीय सदस्यको विवरण आयोगलाई बुझाएका थिए ।

दल दर्ताको विधान अनुसार रेकर्ड भएका केन्द्रीय सदस्यको आधारमा अघि बढ्ने आयोगले तयारी गरेको छ । त्यसैले नेता माधवकुमार नेपालले निर्वाचन आयोगमा नयाँ दल दर्ताका लागि निवेदन दिएको अवस्थामा आयोगले साविककै २०३ सदस्यीय केन्द्रीय कमिटीलाई मान्यता दिने भएको छ ।

निर्वाचन आयोगले माधव नेपाल पक्षलाई फरक पार्टी नेकपा एकीकृत समाजवादी’ दर्ताका लागि सनाखत गर्न आगामी ९ भदौमा बोलाएको छ । नेपाल समूहले अब २६० को २० प्रतिशत नभई २०३ बाटै २० प्रतिशत पु¥याउँदा हुने भएको छ ।

माधव नेपालले गत भदौ २ गते निर्वाचन आयोगमा एमालेका २०३ केन्द्रीय सदस्यमध्ये ५८ सहित अरू केन्द्रीय सदस्य समेत थपेर नयाँ दल दर्ताका लागि निवेदन दिएका थिए । आयोगले ओली पक्षले थपेका केन्द्रीय सदस्यलाई मान्यता नदिने भएसँगै नेता नेपालले आयोगमा बुझाएका ५८ मध्ये ४१ केन्द्रीय सदस्य भए पनि पुग्ने देखिन्छ । अध्यक्ष केपी शर्मा ओलीले कारबाही गरेका १४ जनाले मान्यता नपाएको खण्डमा पनि नेता नेपाललाई आवश्यक सङ्ख्या पुग्ने देखिन्छ ।

संशोधित कानुन अनुसार २० प्रतिशत केन्द्रीय सदस्य वा सांसद सङ्ख्या भनिएकाले नेता नेपाललाई पार्टी गठन गर्न सांसदको आधारमा प्रतिनिधि सभाका १२१ र राष्ट्रिय सभाका ३३ गरी भने १५४ जना सांसदको २० प्रतिशत हुँदा ३१ जना सांसद आवश्यक पर्ने देखिन्छ ।

२०७८ भदौँ ६ गते प्रकाशित