काठमाडौँ । आपसमा मिल्दाजुल्दा डोमेनका न्युज पोर्टल अब सूचीकरण नहुने भएका छन् ।

काउन्सिलले शुक्रबार सूचना जारी गर्दै दर्ता भइ सञ्चालन भइसकेका मिडियालाई आधार बनाई अगाडि वा पछाडि कुनै अंक वा अक्षर जोडेर डोमेन दर्ता–मिडिया दर्ता गराई मिल्दोजुल्दो मास्टहेड, लोगो र नाम (डोमेन नेम) लिएर सूचीकरण हुन आएमा त्यस्ता न्युज पोर्टललाई सूचीकरण नगर्ने निर्णय गरेको हो ।

काउन्सिलको आचारसंहिता अनुगमन उपसमितिको बैठकले विधिवत् रुपमा पहिले नै सञ्चालित अनलाइन मिडियाबाट यस्ता विषयमा काउन्सिलमा पटकपटक उजुरी–गुनासाहरू आउने गरेको पाईएपछि यस्तो निर्णय गरेको हो ।

अनलाइन सञ्चारमाध्यम सञ्चालन निर्देशिका २०७३ (पहिलो संशोधन, २०७४) मा अनलाइन सञ्चारमाध्यम सूचना तथा प्रसारण विभागमा दर्ता हुने व्यवस्था छ ।

पत्रकार आचारसंहिता पालना सम्बन्धमा अनुगमन एवम् निरीक्षण र अभिलेखीकरणका लागि प्रेस काउन्सिल नेपालले सूचीकरण गर्दै आएको छ । मर्यादिन पत्रकारिता गर्दै आएका अनलाइनको नामको नक्कल गरेर पाठकलाई झुक्याएको, पत्रकारिताका नाममा विभिन्न व्यक्तिको चरित्र हत्या र निराधार आक्षेप लगाएको पाइएपछि काउन्सिलले पत्रकारितालाई आचारसंहिताभित्र ल्याउन यस्तो निर्णय गरेको जनाएको छ ।

२०७८ साउन २९ गते प्रकाशित