काठमाडौँ । कोरोना भाइरस विरुद्धको खोप ‘भेरोसेल’ ल्याउन नेपाल वायुसेवा निगमको बाइडबडी ए ३३० जहाज आज चिन जान लागेको छ । आजदेखि साउन ८ गतेसम्म तीन उडान मार्फत खोप नेपाल ल्याउन लागिएको हो । सरकारले सरकार–सरकार (जिटुज) मार्फत चीनबाट ल्याउने भनेको खोप ल्याउन लागेको हो ।
स्वास्थ्य तथा जनसङ्ख्या मन्त्रालयका प्रवक्ता डा. कृष्णप्रसाद पौडेलले चीनबाट भेरोसेल खोप ल्याउनका लागि आज साँझ निगमको विमान खोप लिनका लागि चीन जान लागेको बताउँदै उक्त जहानले असार २५ गते खोप ल्याउने जानकारी दिए ।

यस्तै असार ३१ गते पुनः बाइडबडी जहाज खोप लिन गएर साउन १ गते तथा साउन ७ गते पुनः जहाज नेपालबाट गएर साउन ८ गते खोप ल्याउने छ । “आजदेखि तीन पटक जहाज खोप लिनका लागि चीन जाने छ”, उनले भने, “परिणाम ठूलो आउँछ तर कति आउँछ भन्ने एकिन छैन ।”

पहिलो पटक खोप ल्याइसकेपछि मात्र कति मात्रा खोप नेपाल आएको एकिन थाहा हुने उनको भनाई रहेको छ । चीनको सिनोफार्म कम्पनीबाट सरकारले भेरोसेल खोप खरिद गर्न लागेको हो । खोप नेपाल आइसकेपछि ६० वर्ष मुनि उमेर समूहका मानिसलाई प्रथामिकताका आधारमा लगाउने उनले बताए ।

यस्तै सरकारलाई कोभ्याक्स सुविधामार्फत समेत छिट्टै खोप ल्याउने मन्त्रालयले जनाएको छ ।

खोप आएपछि ६० लाख जनाले खोप लगाउन पाउने छन् । यसअघि कोभ्याक्समार्फत तीन लाख ४८ हजार मात्र खोप आएको थियो । नेपालमा अहिलेसम्म ४२ लाख ४८ हजार खोप आएको छ ।

नेपालमा १८ वर्षभन्दा माथिका कुल दुई करोड २० लाख जनसङ्ख्यालाई खोप लगाउने लक्ष्य लिइएको छ । अहिलेसम्म आठ लाख ५१ हजार ३०० जनालाई दोस्रो मात्रा र २६ लाख ११ हजार ८०७ जनालाई पहिलो मात्राको खोप प्रदान गरिएको छ ।

२०७८ असार २४ गते प्रकाशित