काठमाडौं । मेलम्चीमा हिजोदेखि आएको पहिरोले मेलम्ची खानेपानी आयोजनाको क्याम्पमा समेत क्षति पुगेको छ । अविरल वर्षाका कारण आएको बाढीपहिरोले आयोजनाको संरचना सुरक्षित रहेपनि क्याम्पमा भने क्षति गरेको हो ।

मेलम्ची खानेपानी विकास समितिका प्रवक्ता राजेन्द्र प्रसाद पन्तका अनुसार हेलम्बु गाउँपालिका–१ आम्बाथाङमा रहेको मेलम्ची खानेपानी आयोजनाभन्दा केही तल रहेको क्याम्प बाढीले बगाएको छ। यद्यपी खानेपानीको मुहानमा रहेको हेडवर्क्समा बाढी पस्यो तापनि संरचनामा अहिलेसम्मको अवस्था हेर्दा सुरक्षित रहेको उनको भनाई छ ।

उनले भने ‘हेडवक्र्स निर्माण गरिरहेका कामदार बस्ने क्याम्प बगाएको छ, कामदारको अवस्थाबारे जानकारी अझै आएको भने छैन ।’ तर, क्याम्पभित्र हताहति भएको हुन सक्ने आशंका उनले व्यक्त गरेका छन् ।

प्रवक्ता पन्तले भने, हेडवर्क्सका संरचनाहरू सबै पानीले डुबाएको छ । सरंचनाहरू पानीमुनि देखिन्छन् । तर क्षति देखिएको छैन अहिलेसम्म । पानी कम भएपछि मात्रै एकिन भन्न सकिन्छ ।’

उनले भने ‘सडक अवरुद्ध भएका कारण उक्त स्थानमा जान सम्भव नभएपनि, खानेपानीको मुहानको गेट बन्द गरिएकाले सुरुङ सुरक्षित छ ।’

२०७८ असार २ गते प्रकाशित