स्वतन्त्रताको बढी नै उपयोग गरेछु, माफि चाहन्छुः नरोत्तम वैद्य
वि.सं.२०७८ जेठ २९ शनिवार
काठमाडौँ । वागमती प्रदेशका कांग्रेस सांसद नरोत्तम वैद्यले शुक्रवारको बैठकमा आफूले बोलेका अभिव्यक्ति गलत रहेको स्वीकार गर्दै माफी मागेका छन् ।
शनिवार प्रदेशसभा बैठक शुरु भए लगत्तै रोष्टममा उभिएर वैद्यले आफ्नो अभिव्यक्ति गलत रहेको स्वीकार गर्दै क्षमा मागेका हुन् । उक्त अभिव्यत्तिलाई लिएर सामाजिक सन्जालमा क्रिया प्रतिक्रिया आएको र आफ्नो पार्टीले समेत माफी माग्न निर्देशन दिएकाले आत्मालोचना गर्दै फिर्ता लिएको उनले बताए ।
लिखित आत्मालोचना गर्दै वैद्यले आफूले अभिव्यक्ति स्वतन्त्रताको बढी नै उपभोग गरेको महशुस गरेको स्वीकार गर्दै आफ्नो भनाइ प्रदेश सभाको रेकर्डबाट हटाउन समेत आग्रह गरेका छन् ।
वैद्यले सांसदले संसदमा बोलेको कुरामा कहिँ कतै मुद्दा नलाग्ने भन्ने बुझेर बढी नै बोलेको स्वीकार गरे । वैद्यले माफी मागेपछि सभामुख सानुकुमार श्रेष्ठले उनको भनाइ रेकर्डबाट हटाइएको जानकारी बैठकलाई गराएका छन् ।
२०७८ जेठ २९ गते प्रकाशित
प्रकाशित समय : ०६:५९ बजे
