काठमाडौँ । हाइड्रोइलेक्ट्रिसिटी इन्भेस्टमेन्ट एन्ड डेभलपमेन्ट कम्पनी लिमिटेड (एचआईडीसीएल)को सेयर मुल्यमा समायोजन भएको छ । कम्पनीको प्रतिकित्ता ३४३ रूपैयाँमा शेयरमूल्य समायोजन भएको हो ।

नेपाल स्टक एक्सचेञ्ज (नेप्से) ले कम्पनीले चुक्ता पूँजीको शतप्रतिशत (१ः१) हकप्रद जारी गर्न शुक्रबार बुक क्लोज मिति तोकेसँगै हकप्रदमा मूल्य समायोजन गरी समायोजित मूल्य तोकेको हो ।

नेप्सेले कम्पनीको बिहीबारको कारोबार भएको अन्तिम मूल्य ५८६ रुपैयाँका आधारमा १०० प्रतिशत हकप्रदपछि मूल्य समायोजन गरेको हो । यसअनुसार अब कम्पनीको आइतबार समायोजित शेयरमूल्यलाई आधार मानेर शेयर कारोबार खुल्नेछ ।

कम्पनीले १ बराबर १ अनुपातमा १०० रुपैयाँ अंकित दरमा ११ अर्ब रुपैयाँ बराबरको ११ करोड कित्ता हकप्रद शेयर बिक्री गरेर पूँजी बढाउन लागेको हो ।

उक्त हकप्रद जारी गर्न कम्पनीले नियामक निकाय धितोपत्र बोर्डबाट जेठ ९ गते, आइतबार अनुमति पाएको थियो ।

कम्पनीको हकप्रद निष्कासन तथा बिक्री प्रबन्धक ग्लोबल आईएमई क्यापिटल रहेको छ ।

२०७८ जेठ २८ गते प्रकाशित