काठमाडौँ । फ्रान्सका राष्ट्रपति एमानुएल माक्रोँलाई सार्वजनिक स्थलमै चड्कन हान्ने दुई जना पक्राउ परेका छन् । देशको दक्षिणपूर्वी भागमा भ्रमण गरिरहेको बेला मुहारमा उनलाई एक पुरुषले चड्कन हानेका थिए ।

सामाजिक सञ्जालमा फैलिरहेको एक भिडिओमा भ्यालेन्स शहरबाहिरको भागमा भ्रमणको बेला राष्ट्रपति माक्रोँ एक सुरक्षा तगारो राखिएको ठाउँमा मानिसहरूलाई भेट्न पुगेका थिए। सोही ठाउँमा उनलाई चड्कन हानिएको हो । उनलाई चड्कन हानेको आरोपमा दुई आरोपित पक्राउ गरेको फ्रान्सका सञ्चारमाध्यमहरुले जनाएका छन् ।

माक्रोँमाथि आक्रमण हुँदा लगत्तै सुरक्षाकर्मीहरूले राष्ट्रपतिलाई तानेर लगेका हुन् । घटनापछि बोल्दै माक्रोँले त्यसलाई एक असामान्य घटना भनेका छन्।

‘हामीले अति हिंसक मानिसहरूलाई सार्वजनिक बहसमाथि नियन्त्रण जमाउन दिनु हुँदैन। ती यसको लायक छैनन्,” उनले फ्रान्सकै एक पत्रकारलाई भनेका छन् ।
अहिले देशमा राजनीतिक वातावरण बिग्रिरहेको बताउँदै माक्रोँका समर्थक र विपक्षी दुवैले उक्त घटनालाई लिएर आक्रोश व्यक्त गरिरहेका छन्।
अर्को वर्षको चुनावमा माक्रोँको सम्भावित प्रतिस्पर्धी लोकप्रियतावादी नेतृ मारिन ल पेनले समेत राष्ट्रपति विरूद्धको हिंसा अस्वीकार्य रहेको बताएकी छिन् ।

को हुन चड्कन हान्ने?
माक्रोँलाई आक्रमण गर्ने उक्त पुरुषले ‘मोँजुवा सान्ट डेनी’ भनेर चिच्च्याएका थिए। जुन नारा फ्रान्सेली इतिहासका राजा शार्लामेनको समयसँग जोडिएको छ।
यद्यपी हालसम्म चड्कन हान्ने पुरुषको परिचय र उनको नियत प्रस्ट भएको छैन।