मुख्यमन्त्री पोखरेलले दिए राजीनामा
वि.सं.२०७८ वैशाख १९ आइतवार
काठमाडौं–मुख्यमन्त्री शंकर पोखरेलले राजीनामा दिएका छन् । लुम्बिनी प्रदेशका मुख्यमन्त्री पोखरेलले आज प्रदेश प्रमुखको कार्यालयमा राजीनामा पेश गरेका हुन् ।
लुम्बिनी प्रदेश सरकारका प्रवक्ता बैजनाथ चौधरीले मुख्यमन्त्री पोखरेलले राजीनामा दिएको पुष्टि गरे । विपक्षीको निवेदनको आधारमा आज विशेष अधिवेशन बस्नुअघि मुख्यमन्त्री पोखरेलको राजीनामा आएको हो । यससँगै लुम्बिनीमा नयाँ सरकार गठनको बाटो खुलेको छ ।
दाङ क्षेत्र नम्बर २ (क)बाट प्रदेशसभा निर्वाचनमा विजयी पोखरेल २०७४ फागुनमा मुख्यमन्त्री बनेका थिए । उनीविरुद्ध नेपाली कांग्रेस, नेकपा (माओवादी केन्द्र) र जनता समाजवादी पार्टी (जसपा) ले अविश्वास प्रस्ताव दर्ता गरेका थिए । उनीविरुद्धको अविश्वासको प्रस्ताव आज दिउँसो १ बजे प्रदेश सभामा छलफल हुने कार्यसूची थियो ।
प्रकाशित समय : ०५:०० बजे
