एक्सेल डेभलपमेन्ट बैंकको ३० प्रतिशत हकप्रद असोज २५ बाट निष्कासन हुने
वि.सं.२०७८ असोज ७ बिहीवार
काठमाडौँ। एक्सेल डेभलपमेन्ट बैंकले यही असोज २५ गतेबाट आफ्ना सेयरधनीहरुलाई ३० प्रतिशत हकप्रद सेयर बिक्री खुला गर्ने भएको छ।
बैंकले चुक्तापुँजी ८१ करोड ११ लाख २१ हजार २२४.७२ रुपैयाँको १०ः३ अनुपातमा हकप्रद सेयर निष्कासन गर्ने भएको हो। जसअनुसार बैंकले १०० अंकित दरका कुल २४ लाख ३३ हजार ३६३.६७४२ कित्ता हकप्रद जारी गर्नेछ।
नेपाल धितोपत्र बोर्डले यो बैंकलाई गत साउन ३१ गते हकप्रद निष्कासनको अनुमति दिएको थियो। धितोपत्र बिक्री प्रबन्धकमा एनआईबिएल एस क्यापिटल लिमिटेड रहेको छ।
यो हकप्रदमा नेपाल धितोपत्र बोर्डबाट आस्बा अनुमति प्राप्त बैंक तथा वित्तीय संस्था र मेरो सेयरमार्फत पनि आवेदन दिन सकिनेछ।
एक्सेल डेभलपमेन्ट बैंकको हकप्रदमा आउँदो कात्तिक १४ गते बैंकिङ समयसम्म आवेदन दिन सकिनेछ।
हकप्रद जारी प्रयोजनका लागि बैंकले गत असोज १ गते एक दिनका लागि बुक क्लोज गरिसकेको छ। यसको अर्थ गत भदौ ३१ गतेसम्म कायम सेयरधनीहरुमात्रै आवेदन दिन योग्य भएका छन्।
२०७८ असोज ७ गते प्रकाशित
प्रकाशित समय : १०:२५ बजे
