काठमाडौँ । ‘एक शिक्षण संस्था एक उद्यम’ कार्यक्रमका लागि प्रस्ताव आह्वान गरिएको छ। राष्ट्रिय युवा परिषदले प्राविधिक तथा व्यावसायिक धार÷शिक्षा सञ्चालित वा नमुना सामुदायिक माध्यमिक विद्यालयका लागि एक शिक्षण संस्था एक उद्यम कार्यक्रम लागि प्रस्ताव पेस गर्न आह्वान गरेको हो।

यो कार्यक्रममा सहभागी हुन चाहने विद्यालयले सम्बन्धित स्थानीय तहको सिफारिस ल्याउनुपर्नेछ। उद्यम सञ्चालनका लागि विद्यालय व्यवस्थापन समितिको प्रतिबद्धता आवश्यक पर्नेछ।

उद्यमी विद्यार्थी क्लब गठन भएको निर्णयको प्रतिलिपि र उद्यम कोष स्थापना भएको प्रमाण पनि पेस गर्नुपर्ने युवा परिषदले जनाएको छ।

यसैगरी पूर्वविद्यार्थी मञ्च गठन भएको निर्णयको प्रतिलिपि र पदाधिकारीहरुको विवरण, पछिल्ला ३ शैक्षिकसत्रको शैक्षिक उपब्धि विवरण र पछिल्लो आर्थिक वर्षको लेखापरीक्षण प्रतिवेदनको प्रतिलिपि पेस गर्नुपर्नेछ।

प्राविधिक तथा व्यावसायिक धार÷शिक्षा लागू भएका वा नमुना विकासका लागि छनोट भएका सामुदायिक माध्यमिक विद्यालयमात्र यो कार्यक्रम सहभागी हुन पाउनेछन्।

यस कार्यक्रमका लागि प्रत्येक प्रदेशबाट १÷१ र संघबाट १ गरी ८ वटा विद्यालय छनोट हुने युवा परिषदले जनाएको छ। छनोट भएका विद्यालयले उद्यम सञ्चालन गर्न बीउ पुँजीका रुपमा ७ लाख रुपैयाँ अनुदान पाउनेछन्।

इच्छुक सामुदायिक विद्यालयले आज भदौ २३ गतेबाट ३० दिनभित्र प्रस्ताव राष्ट्रिय युवा परिषदको ई–मेल [email protected] मा पठाउन सक्नेछन्।
२०७८ भदौ २३ गते प्रकाशित