काठमाडौँ । गरिमा विकास बैंकले गत आर्थिक वर्षको चौथो त्रैमासिक सम्ममा करिब ५० प्रतिशतले नाफा बढाउन सफल भएको छ । बैंकले अघिल्लो आर्थिक वर्षमा अघिल्लो आर्थिक वर्षको तुलनामा झण्डै २५ करोड रुपैयाँ बढी खुद नाफा बढाएको छ ।

अघिल्लो आवको समिक्षा अवधिमा ५७ करोड ७२ लाख रुपैयाँ खुद नाफा आर्जन गरेको यस बैंकले गत आर्थिक वर्षमा ८२ करोड ५२ लाख रुपैयाँ खुद नाफा कमाएको हो । बैंकको नाफा अघिल्लो आर्थिक वर्षको सोही अवधिको तुलनामा ४२.९६ प्रतिशत बढी हो।

यसरी नै अपरिष्कृत वित्तीय विवरण अनुसार बैंकको वितरणयोग्य नाफा ६० करोड ५७ लाख रुपैयाँ रहेको छ।

हाल बैंकको चुक्ता पूँजी ३ अर्ब ६७ करोड ५९ लाख रुपैयाँ रहेको छ । यता वार्षिक प्रतिशेयर आम्दानी २२.४५ रुपैयाँ पुगेको छ । बैंकको जगेडा कोषमा एक अर्ब बढी र शेयरधनी कोषमा ६१ करोड रुपैयाँ सञ्चित रहेको छ ।

असार मसान्तसम्ममा बैंकले ६३ अर्ब ९० करोड रुपैयाँ निक्षेप संकलन गरी ५१ अर्ब ८० करोड रुपैयाँ कर्जा परिचालन गरेको छ । यसबाट बैंकले १ अर्ब ९३ करोड खुद ब्याज आम्दानी र एक अर्ब १६ करोड सञ्चालन नाफा आर्जन गरेको छ । बैंकको निक्षेप ५०।६० प्रतिशत र कर्जा ४८।६० प्रतिशतले बढेको हो।

समीक्षा अवधिमा बैंकको खुद ब्याज आम्दानी १९.३७ प्रतिशत र सञ्चालन नाफा ४३.८४ प्रतिशतले बढेको हो । त्यसैगरी, बैंकको कुल सञ्चालन आम्दानी ३८.३७ प्रतिशत बढेको छ।

यस अवधिमा बैंकको पूँजीकोष ११.४२ प्रतिशत, खराब कर्जा अनुपात ०।७२ प्रतिशत, कोषको लागत ६.१७ प्रतिशत, आधार ब्याजदर ८.१७ प्रतिशत, स्पेडदर ४.५ प्रतिशत, प्रतिशेयर नेटवर्थ १४४.०१ रुपैयाँ र मूल्य आम्दानी अनुपात २४.२३ गुणा रहेको छ।
२०७८ साउन २८ गते प्रकाशित