काठमाडौँ । साताको अन्तिम कारोबार दिन बिहीबार नेप्से परिसूचक हालसम्मकै उच्च बिन्दुमा पुगेको छ । आज नेप्से १.०५ प्रतिशत अर्थात २९.६४ अङ्कले बृद्धि भएको नेप्से २८५६.७७ बिन्दुमा रोकिएको छ ।
यस अघि गत जेठ १६ गते आइतबार नेप्से १.१३ प्रतिशतले बढेर २८४७.३० बिन्दुमा पुगेको थियो ।
बिहीबार २१८ ओटा कम्पनीको एक लाख ५५ हजार ६५५ पटकको व्यापारमा ३ करोड ४६ लाख ९१ हजार ३१२ कित्ता शेयर खरिदबिक्री हुँदा १६ अर्ब ९० करोड ७० लाख २० हजार रुपैयाँ बराबरको कारोबार भएको छ ।
नेप्से परिसूचक बृद्धिसँगै आज बजार पूँजीकरण रकम पनि ३९ खर्ब ६४ अर्ब २१ करोड २१ लाख ५१ हजार पुगेको छ ।

आज कारोबारमा आएका १३ समूहमध्ये चारओटा समूहको परिसूचकबाहेक सबै समूहको परिसूचकमा हरियाली छाएको छ । आज बैंकिङ, विकास बैंक, वित्त र होटल्स तथा पर्यटन समूहमा लगानीकर्ताहरु झुम्मिएका छन् । यी समूहको परिसूचक सबैभन्दा बढी अङ्कले बृद्धि भएको छ ।

आजको कारोबारमा बैंक समूहको परिसूचक २.७१ प्रतिशत, विकास बैंक समूहको ३.७२ प्रतिशत, वित्त समूहको ३.३४ प्रतिशत, होटल तथा पर्यटन समूहको ३.३२ प्रतिशतले परिसूचक बृद्धि भएको हो ।

यसैगरी म्युचुअल फण्डको लगानीकर्ताहरुले १.२९ प्रतिशत, लघुवित्तको ०.७५ प्रतिशत, उत्पादन तथा प्रशोधन समूहको १.२२ प्रतिशत, जीवन बीमा समूहको ०.०३ प्रतिशत र लगानी समूहका लगानीकर्ताहरुले पनि ०.०७ प्रतिशतले नाफा बृद्धि गरेका छन् ।

यो दिन हाइड्रो पावर समूहको परिसूचक २.०४ प्रतिशत, निर्जीबन बीमा समूहको ०.७६ प्रतिशत, अन्य समूहको ०.७२ प्रतिशत र व्यापारिक समूहको परिसूचक ०.२३ प्रतिशतले घटेको छ ।

बिहीबार मञ्जुश्री फाइनान्स र महिला लघुवित्तको शेयरमूल्यमा पोजेटिभ सर्किट लागेको छ । यी कम्पनीहरुको शेयरमूल्य क्रमशः ७५ रुपैयाँ र ४३२ रुपैयाँले बृद्धि भएको हो । यसैगरी गोर्खाज फाइनान्स र ग्रीन डेभलपमेन्ट बैंकको शेयरमूल्य पनि ९ प्रतिशत बढीले बृद्धि भएको छ ।

बढेको बजारमा आज पञ्चकन्यामाई हाइड्रो पावर र राधी विद्युत कम्पनीका लगानीकर्ताहरुले सर्वाधिक गुमाएका छन् । पञ्चकन्याका लगानीकर्ताहरुले ५.९२ प्रतिशत र राधीका लगानीकर्ताहरुले ५.०६ प्रतिशतले नाफा गुमाएका हुन् ।

आजको कारोबार रकममा नेपाल पुनर्बीमा कम्पनीको हिस्सा सर्वाधिक बढी देखिएको छ । उक्त कम्पनीको एक अर्ब २ करोड ७० लाख २७ हजार रुपैयाँ बराबरको कारोबार भएको हो ।

यसैगरी छिमेक लघुवित्त विकास बैंकको पनि ६८ करोड १६ लाख ५० हजार रुपैयाँ बराबरको शेयर कारोबार भएको छ भने लुम्बिनी विकास बैंकको ३५ करोड ५ लाख ९२ हजार रुपैयाँ, नेपाल बंगलादेश बैंकको ३३ करोड २२ लाख ७० हजार रुपैयाँ र नेपाल इन्फ्रास्ट्रक्चर बैंकको ३३ करोड १३ लाख ८६ हजार रुपैयाँ बराबरको शेयर कारोबार भएको छ ।

२०७८ जेठ २० गते प्रकाशित