भाटभटेनीको ११ तले ‘स्मार्ट पार्किङ’ तीन महिनामै निर्माण सकिएर सञ्चालनमा
वि.सं.२०७८ कात्तिक २२ सोमवार
काठमाडौँ । भाटभटेनी सुपरमार्केटले काठमाण्डौको टंगालस्थित मुख्य सुपरमार्केटमा नेपालकै पहिलो ११ तले भर्टिकल ‘स्मार्ट पार्किङ’ सञ्चालनमा ल्याएको छ । उक्त स्मार्ट पार्किङको समुद्घाटन आइतबार भाटभटेनीका अध्यक्ष मीनबहादुर गुरुङले औपचारिक रुपमा उद्घाटन गरेका हुन् ।
अध्यक्ष गुरुङका अनुसार उक्त स्मार्ट पार्किङको निर्माणकार्य ३ महिनामै पूरा गरी सञ्चालनमा ल्याईएको हो । करिब ४ आनामा बनेको ४४ वटा गाडी राख्न सकिने क्षमतायुक्त यो स्मार्ट पार्किङ चिनियाँ प्रविधिमा आधारित रहेको बताए ।
यसको निर्माण कार्य भने भारतीय प्राविधिकले गरेका हुन्।
हाइड्रोलिक सिष्टमबाट सञ्चालित स्मार्ट पार्किङले हालको गाडी पार्किङ समस्या समाधान हुनेमा भाटभटेनी विश्वस्त छ। स्मार्ट पार्किङमा कार्ड स्क्यान गरेपछि खाली रहेको ठाउँमा लगेर गाडी पार्किङ गर्न सकिने भाटभटेनीले जनाएको छ। पछि स्क्यान गरेपछि गाडी तल झर्छ।
यसअघि टंगालमा रहेको भाटभटेनीमा रहेको पार्किङ करिब ७५ वटा गाडी राख्ने मिल्ने क्षमताको थियो।
प्रकाशित समय : ११:५३ बजे
